العينك يشافيها -- والماي لو بيها

--العينك يشافيها -- والماي لو بيها --

يالهمك ابگلبك -- لوضيعت دربك
للرضا امشيله -- وشعندك احچيله
---
يالعندك اهموم اشكثر ومدوهن الفكره
ومأيس انته امن المرض للشفه تنتظره
للرضا اتعناله واخذ رايه اله خضره
واعگدها يمه وحلّفه ابفاطمه الزهره
امن العله تتشافه -- بالرضا والطافه
ابنذرك توفيله -- وشعندك احچيله
--
سلطان هوه بالكرم معروف وبعطفه
وهوه طبيب الكل علل والوادم اتعرفه
يالتشكي بعيونك رمد وتدوّر الوصفه
الشباچه طوف وجمرتك من الرمد تطفه
العينك يشافيها -- والماي لوبيها
من عينك ايشيله -- وشعندك احچيله
--
چم اعمه من يمه دخل ويرد نظر عينه
بالجود ماواحد أجه مثل الرضا وينه
حتى الذي دين انطلب يوفي اله دينه
وللمعوز او عنده عسر ميقصر ايعينه
اطلبها اطلبها -- امن الرضا اطلبها
الغيره لتشكيله -- وشعندك احچيله
--
ياهو عزيز امفارگه لو مبتعد عنه
للرضا ايروح ايعفره الشباچه بالحنه
ومن عنده يطلب هالطلب مايعتذر منه
ايفرحه ابو محمد أبد ميخبه الظنه
والغالي والغالي -- يرجعلك الغالي
وبوسات تهديله -- وشعندك احجيله
--
السيد عدنان الحمامي
نسألكم الدعاء

أضف تعليق