اجت بيض القوافي .. محزمه وتلهث
تراويني .. السعادة .. اشما دليلي اغتث
تطش .. ورد الربيع .. اعله البسيطة الوان
وتعزف للفلك .. انشودة المبعث
مرحب ,, يا محمد .. والرسالة وياك
للتوحيد .. شتله .. وللكفر تجتث
يا نور الرقيب الفالق الأصباح
والكل المجرة .. بكل وقت تنبث
نعم .. يوم الحشر .. موجود .. جنة ونار
من العالم البرزخ والخلق .. تبعث
بس .. تفرغ الجنة .. وتمتلي النيران
لو ما كان شخصك .. للبشر يـُبعث
يا حامل بلاغ .. الما تحمله اجبال
غدا ً للصالحين .. الأرض تتورث
ما تنفع أرض .. خصبة .. بوفير الماء
اشما تتعب عليها .. وهل الأرض تـُحرث
تترجه الثمار .. ابلا بذور .. ايصير ...؟
يا بذرة الدين .. العيب تتلوث
يا رحمة الباري .. العتقت .. الأعناق
كف الجاهلية .. اولا نظف .. خبث
تتراجف .. فرح .. مو خوف .. من جبريل
من نداك ( أقرء ) .. نور وجهك نث
بعده الوحي ايرتل بايع الكرار
انته تريد حيدر .. ما تريد الرث
خناجر كلها صارت .. اول المشوار
وسط ذيج القمامة .. اعله النظف تبحث
إذا مو قلب أبيض .. يدخل الإسلام ..
لا عصه اتفيده .. ولا يفيده الحث
بس انته .. وعلي .. ركنين هذا الدين
تحفظون الرسالة .. وغيركم يعبث
يا كف ذو الجلال .. ابوجه كل شيطان
والفقار آية .. اتكَـص الملوث
كم من فاسق ٍ .. ضد .. بيضة الإسلام
طعن قلب النبوة بالنسل والحَرث
نكر أجر الرسالة .. أل بالمودة ايكون
يا ذنب اليغفره .. الباب .. من ورث
اكف اللسان شعري .. من الحقائق دوم
تذبحني الحقائق .. والبعض .. تغتث
يا طب اليفيده .. العاشق الأصنام
رد .. الهبل يسجد .. يوم شخصك جث
أفرح .. اي نعم .. واجب بهذا اليوم
بس روحي .. وضميري .. اتريد اتريث
يا منقذ الوادم .. من جحيم النار
في خـُم أسمـَعت .. من جنت تتحدث
جم قول الألك .. في فاطمة الزهراء
روح اسأل فدكها .. والمن اتورث
دمعتين ارد اهل الفرح .. والأحزان
واتنطر القائم .. ساعة اليجتث
كل دابر ظلمها .. والعدالة اتسود
ويبين عزلها .. من السمين .. الغث
واظل رافع لوائي .. بعشق أهل البيت
وثوب ابيض يظل .. والعافه املوث
حـِب حيدر علي .. ويوم القيامة اتشوف
وجهك نور كله .. اوجه غيرك كث
