كلمات : وسام الشويلي - بغداد - الشعب

أم العباس. ياناس. أم الفقرة
ماعافت يوم مظلوم حاير بأمره
يالعافوك ابحيرة
اكصد لأم الغيرة
أم العباس أم العباس
***
يالويه الزمن محتار . من غدره سبب خوفك
يالجربت ناس اهواي. وابشداتك اتعوفك
راح انطيك حل مضمون كحله وينزل بشوفك
مد الأيد لأم عباس مترد خاليه چفوفك
ماتتعذر تنطيك اكثر وكت الشدة اتكلك احضر
انت من اتطيح بس صيح يامولاتي
تلكه المريود موجود حاضر آتي
الصعبه اتصير ازغيرة
اكصد لأم الغيرة ام العباس
***
مستغرب البعض الناس . احجي اوياهم بودّي
هو العنده ام عباس .ليش ايكول ماعندي
الما ناسيها ماتنساه اسمع وافتهم قصدي
واليلكاها يلكه الطيب يلكه الخير متبدي
نبع الطيبه .نخوه وهيبه. حكك ضايع هيه تجيبه
اطلب تنطيك .ترضيك. يالتعرفها
بدموع العين. بحسين .بس حلّفها
طرفك ليش اتديره
اكصد لأم الغيرة
ام العباس ام العباس
***
ليش الفاتحه يقرون. الها المطلب انوضحه
باب الفرج لو مسدود. هيه اتكومله اتفتحه
بس اتكول بسم الله.بسمك تكتب الفرحه
ولو همك جبل بس صيح.يم عباس واتطيحه
اليطلب طلبه. اتريح كلبه. كلش سهله .تصير الصعبه
جربها وشوف متعوف . هاي النعمه
هيبه ونوماس عالناس. نزلت رحمه
باب وميصح غيره
اكصد لأم الغيرة
ام العباس ام العباس
***
بين الفاتحة ومابين ام عباس صاير سر
بس يقرونها يشوفون بيها تيسر المعسر
ذيج ام الكتاب اتصير وابآياتها اتذكر
وهاي ام البنين وشوف جم آية وفه تسطر
للوفايه .نقره الآيه . بجف الغالي. جود و رايه
ام الوفاي بالماي عنوان الها
ميضل انسان عطشان بس يوصلها
وين انته ابيا ديرة
اكصد لأم الغيرة
ام العباس ام العباس
***
عن أم البنين اشلون. احجي وصعبه تتوصّف
فعل اولادها يكفيك.رفعة راس يوم الطف
عالشاطي باسمها ابزود .بيرغ للوفه رفرف
انطت عين لأجل حسين من عباس وانطت جف
صوت اينادي . كل اولادي. فدوه انطيهم لإبن الهادي
اربع أقمار. أطهار بيهم ضحّت
ويه ام حسين .بالدين. بالطف وفّت
يالتبحث بالسيرة
اكصد لأم الغيرة
أم العباس ام العباس
***
وسام الشويلي