الشاعر : حيدر الرويمي

غريبه من اول عمر عاشت
غريبه وبأرض الغرب ماتت
غريبه لا عدها اخو يجيها
غريبه ابدمعه وهضم راحت
**
راحت ام اكبر گلب شايل مصيبه
راحت وذاك القهر ما منه طيبه
راحت وضل الاسم.. زينب غريبه
**
ابجمرة الخيم والشماته
خدر اعز خدر حل مماته
الباقي بالجرح من حياته
.................
العقيله مو جان اسمها اميره
العقيله جنازه وبلا عشيره
العقيله ليش الزمن ضلمها
العقيله ميته وبعدهي اسيره
**
حته من حل الدفن مافض حزنها
حته من وسط اللحد يهمل جفنها
حته دخان الخيم ضل ابچفنها
**
من الحبل بقة تدي اديها
ميته والهضم يسري بيها
لا اخو اعتنه ولا وليها
................
يجرحي هذا الجره بزينب
يجرحي من حزني لا تتعب
يجرحي جار الزمن عليها
يجرحي نوح الهضمها وانحب
**
ماعرف گلب العقيله الراحه مره
ماعرف معنه الحیاة بلايه جمره
ماعرف بس القهر والدمعه حمره
**
من الزغر بدة حسره بيها
بحسره الضلع حل بجيها
واستمرة الحد سبيها
..............
سبيه بياحاله من خذوها
سبيه او وليه الکفر ولوها
سبيه وماكو علم تشوفه
سبيه وبعدوها من اخوها
**
بالفله وليل الخرايب من يمرها
ياخذ الضل بالعقيله من عمرها
بس جسد ضلت عكب عزها وخدرها
**
بلوعة الهزل والضلامه
تباري بالضعن واليتامه
والحزن ترك جم علامه
...............
شكبرها حسرتها من تذبها
شكبرها من العده تسبها
شكبرها من تعثر الهزيله
شكبرها الديره الغصب تطبها
**
خطوه خطوه ام الخدر تمشي وتكابر
حذره زينب خافن اتصدها النواضر
بس مصيبه اليعثر اتدوسه الحوافر
**
الطفله والطفل والارامل
ابذمت الحبل والمحامل
هايه حالته الماله كافل