كلمات الشاعر : حيدر سامي السعدي - الناصريه , الشطرة

يا ليتنا نحچيها بس منو اللي 
يعرف قدر هالكلمة خل يگلي
اولها ياهو المستعد يصلي … وعليه وابل سهام تطيح

هالكلمة دون المعرفة 
صاحبها ريشه بعاصفة   وعنده الوفة   كلام

ياهو اللي نفسه موطنّه
"ويبادل بيوت الهنه"  بخيام 

هاي
فكر بيها … من تحچيها … يا ليتنا وين 
ياهو اليطلع بعياله 
للصحراء الچتالـه 
ويرضى يعطشون اطفاله   لعيون حسين 
هاي 
تتحمل هاي … ماعندك ماي … وابنك عطشان! 
هم تقبل تنطي اوليدك
للخيل وگلبه يريدك 
وتنزل وتلمه بإيدك    من التربان 
يا ليتنا  حسين ! 
يا ليتنا  اسأل عليها گلبك 
مو بس سلم حرب التخدمه حربك 
كل محب يثبت حبه وانت حبك … اذا ما مستعدله سراب 

يا من ربيـت بنعمـته 
و مجالسـه و امحبته   و بخدمته  امير 
راسك رفعته بهالربح 
"هم تقبل براس الرمح"    يصير 

دون 
ابن الزهره … عندك قدره ؟ … على هيچ إمصاب 
هم تتحمل گدامك
مشامر نار اعله خيامك
وخيل اتطارد ايتامك   وانت إعله تراب 

دون 
يا خيمه تموت … من تسمع صوت … مَره تتنخـاك
نسوانك تتقبلها 
بالهيمـه ومحد الها 
هيچ جروح تقابلها     الليتنا بشفاك 
يا ليتنا حسين ! 
يا ليتنا نتأمل النگوله 
وما نحچي كلمة ليتنا بسهوله 
من سمه العاشر يا جرح ننوله   جِروح ابن الزچيه هواي

يجمعنا عنوان الخَدم 
عنوان بس وين الالم   جاه ونِعم   دلال    

ركضتنا لأي خدمه اجت 
"مثل الوراه خيل اركضت"   مُحال 

عَيش 
هم يحله العَيش   لو شفنه الجيش   وحسين اوحيد 
لو شفنه اعداءه الكثره 
نظل وياه لو نتبره 
هل يا ترى ابن الزهره    يلگانه عبيد  ! 

ليش 
هاي الاحلام   منو ينطي الشام   مره مثل ام عون 
يا رخص الدنيه وغمها
زينب زادت على امها  
هودج ما صح يضمها   والدنيه عيون 
يا ليتنا حسين !